Kristnihátíðarsjóður

Kristnihátíðarsjóður var stofnaður til að minnast þess að 1000 ár voru liðin frá því að kristinn siður var lögtekinn á Íslandi. Sjóðurinn starfaði eftir lögum nr. 12/2001 um Kristnihátíðarsjóð. Starfstími sjóðsins var fimm ár eða til ársloka 2005. Ríkissjóður lagði til 100 milljónir króna fyrir hvert hinna fimm starfsára sjóðsins. Hlutverk sjóðsins var tvíþætt: Annars vegar var honum ætlað að efla fræðslu og rannsóknir á mennigar- og trúararfi þjóðarinnar og stuðla að umræðum um lífsgildi hennar, siðferði og framtíðarsýn. Hins vegar var hlutverk sjóðsins að kosta fornleifarannsóknir á helstu sögustöðum þjóðarinnar, m.a. á Þingvöllum, í Skálholti og á Hólum.

Tilkoma Kristnihátíðarsjóðs markaði tímamót í fræðslu og rannsóknum á menningar- og trúararfi þjóðarinna, sem og í fornleifarannsóknum. Lög og frjáveitingar til sjóðsins báru vott um stórhug og framsýni sem hvatti þá sem vinna á þessum sviðum til dáða og góðra verka sem munu gagnast í samtíð og framtíð. Verkefnissvið sjóðsins var vítt og spannaði allt frá lífi íslenskra fonmanna til lífsleikni nútímamannsins, sem þarf oft á tíðum að vera ærin en þó sennilega hvorki meiri né minni en lífsleikni fornmannsins.

Sjóðurinn styrkti yfir 150 verkefni og eru stærstu styrkir sjóðsins með þeim hæstu sem úthlutað hefur verið á Íslandi til rannsókna- og fræðistarfa. Grettistaki hefur verið lyft bæði á sviði fornliefarannsókna á Íslandi og á sviði hug- og félagsvísinda.