Reykholt

Niðurstöður fornleifarannsóknar sem fór fram á gamla kirkjustæðinu í Reykholti árin 2002 til 2007 benda til þess að kirkja hafi staðið þar allt frá því stuttu eftir kristnitökuna árið 1000 og þar til hún var flutt norðar í kirkjugarðinn árið 1886.

Elsta varðveitta beina heimild um kirkju í Reykholti er máldagi hennar frá seinni hluta 12. aldar, en óbeinar vísbendingar eru um kirkju þar nokkru fyrr og hefur rannsóknin staðfest þær. Reykholt var einn af fyrstu og mikilvægustu kirkjustöðum á Íslandi, en þeim var komið á undir lok 11. aldar. Kirkjan varð einnig ein af stærri sóknarkirkjum landsins og er ein sú fyrsta þeirra sem rannsökuð er út frá fornleifafræði.

Uppgröfturinn leiddi í ljós fjórar megingerðir bygginga sem unnt hefur verið að tímasetja af gripum, en uppruna margra þeirra má rekja til Englands, Þýskalands og Frakklands.

Byggingarnar voru ólíkar að stærð, lögun og gerð og hefur hver þeirra verið í notkun um nokkurn tíma með ýmsum tilbrigðum á hverju skeiði. Elsta byggingin virðist hafa verið lítil heimakirkja, tæplega 5 m að lengd, en sú stærsta, sem var um 13 m löng, hefur verið tímasett til 13. eða 14. aldar.

Rannsóknin veitir lengstu þróunarsögu einnar kirkjubyggingar sem til er á Íslandi og bætir miklu við þekkingu okkar á íslenskri kirkjubyggingarsögu.