Hvítasunna
Hvítasunnudagur er sjöunda sunnudag eftir páska, og ber upp á 10. maí til 14. júní. Hvítasunnan var og er einn af þremur helstu atburðum kirkjuársins og haldin til að minnast sendingar heilags anda og stofnunar kristinnar kirkju.
Gyðingar halda hátíðina til minningar um að þá afhenti Drottinn Mósesi boðorðin tíu á Sínaí-fjalli, en enn eldra tilefnis mun að leita í fornri uppskerugleði. Íslenska nafnið er þýtt úr fornensku, og dregið af hvítum klæðum sem borin voru við skírn sem á miðöldum var tíðkuð þennan dag öðrum fremur. Nú er hátíðin vinsæl til ferminga.
Sú trú þekkist um hvítasunnudag að þá væri svefn óhollur heilsu manna, og á sér hliðstæðu í Þýskalandi. Þá sofa hinsvegar ýmsar forynjur frameftir svo hægt er að komast að þeim óvörum. Þennan dag einan er rjúpan óhult fyrir fálkanum. Dagurinn hentar einnig vel til allskyns töfra, einkum undir messu. Á síðari tímum hefur löng fríhelgi á hvítasunnu verið nýtt til veraldlegra hátíða, þar á meðal til kappreiða og rysjóttrar unglingagleði á síðustu áratugum.
Heimild: Saga daganna eftir Árna Björnsson, 1996
