Ýmsar þjóðháttarannsóknir

Rannsóknir á þjóðháttadeild hafa fyrst og fremst falist í því að heimildarmenn deildarinnar hafa svarað spurningaskrám um þjóðhætti. Jafnframt hafa starfsmenn deildarinnar tekið viðtöl í tengslum við spurningaskrárnar. Svörin eru síðan skráð og gerð aðgengileg almenningi. Stúdentar í Háskóla Íslands og víðar hafa mikið notað upplýsingasafnið við ritgerðasmíð og jafnframt rithöfundar og leikmyndasmiðir. Mest hafa þó starfsmenn deildarinnar unnið úr þessum efniviði - sjá ritaskrár starfsmanna.

Eftirfarandi kannanir hefur deildin auk þess gert í samvinnu við aðra:

Samkeppni um minningaskrif.
Árið 1976 gekkst Sagnfræðistofnun, þjóðháttadeild Þjóðminjasafns og Stofnun Árna Magnússonar fyrir samkeppni meðal eldra fólks um minningaskrif. Frásagnir bárust frá 149 aðilum og eru varðveittar á þjóðháttadeild.

Stúdentasöfnunin 1976.
Árið 1976 fór hópur stúdenta við H.Í um landið og safnaði þjóðháttaheimildum. Var aðallega safnað upplýsingum um fráfærur og sumarverk á sveitabæjum upp úr aldamótum, en einnig um vatns- og vindmyllur. Safnið er um 3500 vélritaðar síður, þar sem skrifað er upp eftir, eða vitnað í 457 heimildarmenn. (Um þetta safn er fjallað nánar í Ljóra 1. tbl. 1981).

Dagbókardagurinn
Í tilefni af degi dagbókarinnar 15. október 1998 safnaði þjóðháttadeild í samvinnu við Handritadeild Landsbókasafns Íslands dagbókum Íslendinga um þann dag og einnig frá eldri tíð. Dagbækurnar um 15. okt. - nálægt 6000 -eru varðveittar á þjóðháttadeild.